“”
News

साँच्चै सहारा बन्यो सहारा एकेडेमी

नेपाली फुटबलको इतिहासमा आफ्नो छुट्टै पहिचान बनाउन सफल भएको छ, कास्कीको सहारा एकेडेमी ।

विपन्न वर्गका बालबालिकालाई एकेडेमीमा राखेर उनीहरुलाई दैनिक फूटबल प्रशिक्षण र शिक्षा दिने काम सहारा एकेडेमीले गर्दै आएको छ ।

पोखराको दोबिल्लामा रहेको सहारा एकेडेमीको पहिलो ब्याजका चर्चित खेलाडी हुन्, नेपाली राष्ट्रिय फुटबल टोलीका पूर्व कप्तान अनिल गुरुङ ।

गुरुङ मात्रै होइनन् अहिलेको राष्ट्रिय टोलीमा सहाराको उत्पादन अजित भण्डारी छन् ।

एकेडेमी स्थापना अगाडि पोखराका स्थानीय युवाको पहलमा पोखरा रंगशालामा आहा–रारा गोल्डकप फुटबल प्रतियोगिता आयोजना गरेका थिए ।

एकेडेमी सञ्चालनका लागि आहा रारा गोल्डकप प्रतियोगिता मुख्य आम्दानीको स्रोत हो । एकेडेमीले विभिन्न क्षेत्रका व्यक्ति तथा संस्थाको साथ पाउँदै आएको छ ।

स्थापनको दुई दशक नजिक पुगेको आहा रारा गोल्डकपको १८औं संस्करण मनाङ मर्स्याङ्दी क्लबलाई उपाधि सुम्पिँदै सम्पन्न भएको छ ।

फाइनलमा नेपाल पुलिस क्लबलाई पेनाल्टी सुटआउटमा ४–३ गोल अन्तरले पराजित गर्दै मनाङ छैटौं पटक च्याम्पियन बन्यो ।

प्रतियोगितामा आयोजक टोली सहारा क्लबले क्वाटरफाइनलसम्म स्थान बनायो । क्वाटरफाइनलमा पछि उपविजेता बनेको पुलिससँग पराजित भएपछि उपाधि रक्षा होडबाट सहारा बाहिरियो ।

टोलीमा एकेडेमीका मात्रै छ जना खेलाडीले स्थान बनाए । कमल सोमइ मगर, जीवन रायमाझी, प्रवेश गुरुङ, शिशिर क्षेत्री, अभिषेक राना र अनिश लिम्बु थिए । जुन सहारा क्लबका लागि मात्रै नभई समग्र नेपाली फुटबलका लागि राम्रो उदाहरण बन्यो ।

त्यही टोलीका छ जना मध्येका एक हुन्, सुर्खेत वीरेन्द्रनगरका कमल सोमइ मगर ।

२०७० सालमा सहारा एकेडेमीमा आवद्ध भएको उनी आफ्नो जीवनको लक्ष्य सहाराले पल्याइदिएको बताउँछन् । वीरेन्द्रनगरमा जन्मेहुर्केका उनी १० वर्षको उमेरमा पोखरा आएका हुन् ।

घरमा उनीसहित ३ जना दाजु–भाइ र २ दिदी थिए । जसमा उनी कान्छा भाइ हुन् । कमलका बुबा–आमा छैनन् । त्यसो त, उनी सहाराको अभिभावक नभएका बालबालिकाको कोटामा नै एकेडेमीमा आएका हुन् ।

कमललाई बुबा के कसरी बित्नुभयो बारे खासै जानकारी छैन । आमालाई भने रोग लागेको उनलाई थाहा छ । निम्न वर्गीय परिवारका उनको घरमा जेठा दाजु हेम एक्लै काम गर्थे । उनले कमाएर ल्याएको पैसाबाट ४ जनाको परिवार पाल्नुपर्ने बाध्यता रहेको कमल सुनाउँछन् ।

कमलका दाजु घर बनाउने मिस्त्रीको काम गर्छन् । दैनिकीमा समस्या हुन थालेपछि कमलकी भाउजु पनि काममा जान थालिन् ।

दाजु भाउजु दुवै जना काममा जाने भएपछि कमलले भतिजीको रेखदेख पथ्र्यो । त्यसो हुँदा पढाइमा पनि असर पर्ने गरेको उनी सुनाउँछन् ।

आमा वा बुबामध्ये एक जनाको निधन भएका र पछाडि परेका वर्गका सन्तानलाई एकेडेमीमा राख्ने गरेको छ । सहाराको उक्त मापदण्ड अनुसार नै कमल एकेडेमीमा आइपुगेका हुन् ।

५ कक्षासम्म वीरेन्द्रनगरमै पढेका कमलले कक्षा छ देखि सहारा एकेडेमीमा बसेर पोखराको शिशु कल्याणमा पढे ।

एकेडेमीका खेलाडी पढ्दैनन् भन्ने धारणा कमलले झुटो प्रमाणित गरिदिएका छन् । उनी कक्षा ६ देखि ९ सम्म प्रथम भए । एसईईमा ‘ए’ ग्रेड हासिल गरे । अहिले ‘प्लस टु’ मा व्यवस्थापन संकायमा अध्ययनरत छन् ।

पछिल्लो ५ वर्ष उनले फुटबल र जीवन दुवै बुझेका छन् । अब उनी आफ्नो जीवनका दुई लक्ष्य पहिलो र दोस्रो भनि प्राथमिकतामा राखेका छन् ।

‘मेरो दुई वटा लक्ष्य छ । पहिलो प्राथमिकतामा फुटबल हो । त्यसमा भएन भने विकल्प सोचिसकेको छु,’ कमलले खबरहबसँग भने, ‘सोचे जसरी फुटबल करियर अगाडि बढेन भने लोकसेवा लडेर सरकारी जागिरमा प्रवेश गर्छु ।’

उनी अबको ३ वर्षभित्र नेपालको उमेर समूह हुँदै राष्ट्रिय टोलीमा स्थान बनाउने लक्ष्यमा लागेका छ ।

‘अहिले मैले जसरी मेहनत गरिरहेको छु । त्यसले आफूमा आत्मविश्वास दिलाएको छ । ३ वर्ष भित्र उमेर समुह हुँदै राष्ट्रिय टोलीमा स्थान बनाउने छु,’ उनले भने ।

कमलले मात्रै होइन उनको परिवारको जिम्मेवारी थपिएको बताउँछन् ।

‘घर परिवारले पनि मबाट धेरै अपेक्षा गरेको छ । दाजुले फोन गर्दा सधै तिमी राम्रो गरिरहेका छौं, मेहनत गर भन्नुहुन्छ,’ मगरले भने, ‘घरबाट त्यस्तो भन्दा जिम्मेवारी थपिएको महसुस हुन्छ ।’

सहाराको छहारीमा हुर्केका उनी बोल्नमा पनि स्पष्ट छन् । कतिपय राष्ट्रिय टोलीका खेलाडीले पनि स्पष्ट बोल्न सकेका हुँदैनन् । कमलको ‘बडिल्याङ्वेज’ ले पनि उनी नेपाली फुटबलको भविष्यको भरपर्दो मिडफिल्डर बन्न सक्ने अनुमान गर्न सकिन्छ ।

‘घरबाट राम्रो गर भन्नु हुन्छ । म मेहनत गरिरहेको छु । सके जति राम्रो गर्छु,’ कमलले भने । त्यसो त, उनी आफूमा यस्तो आत्मविश्वासका पछाडि सहारा क्लबको ‘सहारा’ नै मान्छन् ।

कमलको सहारा कनेक्सन पनि भिन्दै छ । पोखराको सहारा एकेडेमी र तत्कालीन मध्यपश्चिमको सुर्खेतका कमल ।
उनका एक जना आफन्त गुगलमा काम गर्छन् ।

उनले नै सहारा एकेडेमीले कमल जस्ता अभिभावकविहीनहरुलाई खेल्ने र शिक्षाको व्यवस्था गर्ने गरेको उनका दाजुलाई भनेका थिए । पछि उनका दाजुले सहारासम्म पुर्‍याइ दिएका हुन् ।

६ वर्ष सहारामा रहेर प्रशिक्षण गरेपछि उनले खेलेको ठूलो नकआउट प्रतियोगिता आहा रारा गोल्डकप हो । आहा रारामा उनको टोली क्वाटरफाइनलसम्म पुगेको थियो । ठूला क्लबहरुसँग खेल्न पाउँदा खुसी लागेको उनी बताउँछन् ।

‘ठूला क्लबसँग खेल्न पाउँदा खुसी छु । टोलीमा गुरु (प्रशिक्षक) राम्रो हुनुहुन्छ । सिक्दैछु,’ होचो कदका उनी भन्छन्, ‘मलाई आफ्नो हाइट ले समस्या गर्छ भन्ने लागेको थियो । तर, त्यसले असर नगर्दो रहेछ । टेक्निक स्पीड भए हुने रहेछ ।’

कमल सहारा क्लबको मिडफिल्डमा राम्रो खेल्ने खेलाडी हुन् । उनी सहारा हुँदै ए डिभिजन लिग क्लब र नेपाली टोलीको मिडफिल्डमा जम्ने लक्ष्यमा रहेका छन् ।

आहा रारा गोल्डकप खेल्नुअघि उनले कास्कीको हेम्जामा आयोजना भएको शुभकामना कप, कास्की लिग र संगम कप खेलेका थिए ।

अबको आफ्नो लक्ष्य सुनाउँदै उनी भन्छन्, ‘अबको २ बर्ष सहाराबाटै खेल्छु । उमेर समूह हुँदै ‘ए’ डिभिजन लिग क्लबदेखि नेपालको प्रतिनिधित्व गर्ने लक्ष्य छ ।’

सन्तोषराज पाण्डे
८ चैत्र २०७६, शनिबार
www.khabarhub.com

Leave a Comment